श्री भगवती स्तोत्र | Shri Bhagwati Stotra | Free PDF Download

जय भगवति देवी नमो वरदे, जय पापविनाशिनी बहुफलदे ।

जय शुम्भनिशुम्भकपालधरे, प्रणमामि तु देवी नरार्तिहरे ।।1।।

जय चन्द्रदिवाकरनेत्रधरे, जय पावकभूषितवक्त्रवरे ।

जय भैरवदेहनिलीनपरे, जय अंधकदैत्यविशोषकरे ।।2।।

जय महिषविमर्दिनि शूलकरे, जय लोकसमस्तकपापहरे ।

जय देवी पितामहविष्णुनते, जय भास्करशक्रशिरोऽवनते ।।3।।

जय षण्मुखसायुधईशनुते, जय सागरगामिनि शम्भुनुते ।

जय दुःखदरिद्रविनाशकरे, जय पुत्रकलत्रविवृद्धिकरे ।।4।।

जय देवि समस्तशरीरधरे, जय नाकविदर्शिनि दुःखहरे ।

जय व्याधिविनाशिनि मोक्षकरे, जय वांछितदायिनि सिद्धिवरे ।।5।।

एतद्व्यासकृतं स्तोत्रं य: पठेन्नियत: शुचि: ।

ग्रहे वा शुद्धभावेन प्रीता भगवती सदा ।।6।।